Gəncə Dövlət Universitetinin (GDU) Riyaziyyat və informatika fakültəsində akademik Yusif Məmmədəliyevin 120 illik yubileyinə həsr olunan “İşıqlı elm yolu” adlı elmi seminar keçirilib.

TƏHSİL.BİZ-in bölgə müxbiri xəbər verir ki, seminarda universitetin humanitar məsələlər üzrə prorektoru Gülsüm Fətəliyeva “Akademik Yusif Məmmədəliyevin 120 illik irsi” mövzusunda məruzə ilə çıxış edib. Qeyd edib ki, görkəmli alim nəinki Azərbaycan və SSRİ-də, hətta dünyada da tanınmış alim olub. O, Yusif Məmmədəliyevin II Dünya müharibəsinin gedişində yüksəkoktanlı aviasiya yanacağının hazırlanmasında oynadığı roldan danışıb.

Seminarda Riyaziyyat və informatika fakültəsinin dekanı Oruc Hüseynov “Yusif Məmmədəliyevin İkinci Dünya müharibəsinə verdiyi elmi töhfələr”, Riyazi analiz kafedrasının müdiri Orucəli Rzayev “Azərbaycan neft kimyasının qızıl dövrü”, Ümumi riyaziyyat kafedrasının müdiri Sübhiyyə Zeynallı “Elmi irsin yaşadılması” və Riyaziyyat müəllimliyi ixtisasının IV kurs tələbəsi Qənirə Rzazadə “Elm uğrunda ömür”, Riyaziyyat və informatika müəllimliyi ixtisasının tələbələri Səbinə Həsənova “Elmi kəşflərin qüdrəti” və Fatimə Əmirova “Neft kimyasının banisi” adlı məruzələrdə akademikin şəxsiyyəti, elmə yanaşma prinsipləri və vətənpərvərlik keyfiyyətləri barədə çıxışlar ediblər.

Seminarda akademik Yusif Məmmədəliyevin elmi fəaliyyətinə həsr olunan “Zamanın zirvəsi” adlı film nümayiş etdirilib.