Azərbaycan Həmkarlar İttifaqları Konfederasiyasının Əmək və Sosial Münasibətlər Akademiyasının (AƏSMA) bir qrup tələbəsi “Holberton School Azerbaijan”da keçdikləri təlimləri uğurla başa vurublar.

Bununla əlaqədar təşkil olunan “Məzun günü”ndə AƏSMA-nın rəhbərliyi və kollektivi, eyni zamanda “Holberton School Azerbaijan”ın nümayəndələri iştirak ediblər.

Tədbirdə çıxış edən AƏSMA-nın rektor vəzifəsini icra edən Fərid Babayev Akademiya ilə “Holberton School Azerbaijan” arasında əməkdaşlığın tələbələrin rəqəmsal bacarıqlarının inkişafına mühüm töhfə verdiyini vurğulayıb və proqramı uğurla tamamlayan məzunları təbrik edib. Fərid Babayev həmçinin tərəfdaşlığın daha da genişləndirilməsinin və yeni birgə təlimlərin həyata keçirilməsinin Akademiyanın gələcək planları sırasında olduğunu qeyd edib.

 “Holberton School”un təsisçisi Florian Buçer çıxışında təlimlərin gənc mütəxəssislərə rəqəmsal transformasiya dövründə əmək bazarının dəyişən tələblərinə daha çevik uyğunlaşmaq imkanı yaratdığını bildirib. “Holberton School Azerbaijan”ın icraçı direktoru Şəmsi Bayramzadə məzunların İKT və proqramlaşdırma bacarıqlarına peşəkar səviyyədə yiyələnməsini yüksək qiymətləndirib.

Tədbir zamanı təlim müddətində məzunların gördüyü işləri əks etdirən videoçarx nümayiş olunub, eləcə də onların hazırladıqları buraxılış layihəsi - AƏSMA-nın iclas zallarının rezervasiya sistemi təqdim edilib.

Sonda təlim proqramını uğurla başa vuran tələbələrə sertifikatlar təqdim olunub.

Qeyd edək ki, 23 iyun 2025-ci il tarixində AƏSMA ilə “Holberton School Azerbaijan” arasında Əməkdaşlıq Memorandumu imzalanıb. Sənəd proqramlaşdırma və süni intellekt sahələrində mütəxəssislərin hazırlanmasını, innovativ layihələrin birgə həyata keçirilməsini, qarşılıqlı təcrübə və resurs mübadiləsini, eləcə də AƏSMA tələbələri üçün ödənişsiz tədris proqramlarının təşkili istiqamətlərini əhatə edir.