Mədəniyyət naziri Adil Kərimli noyabrın 29-da Ağdam rayonunun Quzanlı qəsəbəsində vətəndaşların müraciətlərini dinləyib.
Qəbuldan əvvəl nazir və Ağdam rayonunun icra başçısı Vaqif Həsənov Ümummilli lider Heydər Əliyevin qəsəbədəki abidəsi önünə gül dəstəsi qoyaraq əziz xatirəsini ehtiramla yad ediblər.
Ağdam rayon Heydər Əliyev Mərkəzində keçirilən və nazirliyin məsul əməkdaşlarının da iştirak etdiyi görüşdə Ağdam, Ağcabədi, Bərdə, Tərtər, Füzuli və Laçın rayonlarından olan vətəndaşlar müraciətlərini diqqətə çatdırıblar.
Müraciətlər məşğulluq, mədəniyyət sahəsinə dair layihə və təşəbbüslər, iş yerinin dəyişdirilməsi və digər məsələlərlə bağlı olub.
Nazir Adil Kərimli vətəndaşların xahiş və təkliflərini dinləyib, hər bir məsələnin operativ araşdırılması, qanunvericiliyə uyğun həlli ilə bağlı addımlar atılacağını bildirib.
Qəbulda iştirak edən şəhid ailələri və qazilər tərəfindən qaldırılan məsələlərə xüsusi diqqətlə yanaşılması və obyektiv baxılması ilə bağlı tapşırıqlar verilib.
