Mədəniyyət Nazirliyinin dəstəyi və “Mirvarid Dilbazi Poeziya Məclisi” İctimai Birliyinin təşkilatçılığı ilə şəhid Zaur İsmayılzadənin anadan olmasının 30 illiyinə həsr olunmuş “Əbədiyyətə qovuşan ömür” adlı xatirə gecəsi keçirilib.

Azərbaycan Dövlət Mahnı Teatrında təşkil olunan tədbirdə ictimai birliyin sədri Güllü Eldar Tomarlı, şəhidin anası Sevil Hüseynova çıxış ediblər.

Bəstəkar müğənni Ruslan Səfəroğlu tərəfindən şəhid Zaur İsmayılzadəyə ithaf edilən musiqi nömrəsi səsləndirilib.

Şair Səadət Buta, Xətai Rayon Ağsaqqallar Şurasının sədri və şəhid atası Mürvət Əsgərov, Əməkdar mədəniyyət işçisi aşıq Solmaz Kosayeva, yazıçı-jurnalist, şəhid Zaur İsmayılzadə haqqında "Burğa tələsi" kitabının müəllifi Ötərxan Eltac və digər çıxışçılar Zaur İsmayılzadənin döyüş yolundan, gənclik üçün örnək olan vətənpərvərliyindən söz açıblar.

Rejissor Nail Naiblinin şəhid Zaur İsmayılzadə üçün hazırladığı videoçarx nümayiş etdirilib.

Şəhidin həyatını, döyüş yolunu əks etdirən tamaşa-kompozisiya (quruluş müəllifi Polad Ağa İbrahimov) təqdim olunub. 

Bəstəkar-müğənni Arif Mehmandost, müğənnilər Yusif Sadıqov, İnci Şirvanlı, Tahirə Yusifzadə və Taleh Zəngilanlı şəhidin əziz xatirəsinə həsr olunmuş ifalar səsləndiriblər.