"Laçın – MDB-nin Mədəniyyət Paytaxtı 2025" ilinin bağlanış mərasimi çərçivəsində noyabrın 29-da Qara Qarayev adına Azərbaycan Dövlət Kamera Orkestri şəhərdəki “LaCinema” kinoteatrında çıxış edib.

Üzeyir Məmmədovun dirijorluğu ilə keçirilən konsertin tamaşaçıları arasında Azərbaycan Respublikası Prezidentinin Laçın rayonu üzrə xüsusi nümayəndəsi Məsim Məmmədov, Milli Məclisin Mədəniyyət komitəsinin sədri Polad Bülbüloğlu, mədəniyyət nazirinin müavini Fərid Cəfərov, MDB-nin Humanitar Əməkdaşlıq üzrə Dövlətlərarası Fondunun icraçı direktoru Tahir İksanov, MDB ölkələrinin nümayəndələri və Laçın sakinləri iştirak ediblər.

Orkestrin ifasında Ü.Hacıbəylinin “Arazbarı” zərbi muğamı, “Arşın mal alan” operettasından uvertüra, A.Vivaldinin “İlin fəsilləri” silsiləsindən “Yay” (solist: Səid Məmmədov, violin), V.A.Motsartın "Kiçik gecə serenadası", D.Dadaşovun “Skerso” (solist: Əməkdar artist Çinarə Heydərova, qanun), “Qadın ətri” filmindən “Tanqo” (Karlos Qardel), A.Məlikovun “Sehrli xalat” filminə yazdığı musiqidən “Qızların rəqsi”, C.Cahangirovun “Cənnətim Qarabağ” (solist: Nurlana Abdullayeva, vokal), Q.Qarayevin “Yeddi gözəl” baletindən “Vals”, Y.Qadenin “Tanqo "Jalüz”, T.Quliyevin “Qaytağı” (solist: Rəvan Mustafazadə, tar), A.Əlizadənin “Cəngi”, P.İ.Çaykovskinin “Vals”, E.İbrahimovanın “Ey Vətən”, E.Sabitoğlunun “Dədə Qorqud” filmindən “İncəbellim”, F.Əmirovun “Min bir gecə” baletindən “Şəhrizadın bayramı" əsərləri və “Şalaxo” Azərbaycan xalq rəqsi (solist: Ç.Heydərova, qanun) təqdim olunub.

Konsert proqramına Taleh Yahyayevin (bariton) ifasında M.Maqomayevin “Azərbaycan” mahnısı ilə yekun vurulub.