Logo

Cəlilabad Dövlət Peşə Təhsil Mərkəzinə infotur təşkil edilib - FOTO

24.05.2024 19:36 226 baxış
IMG

Elm və Təhsil Nazirliyi və Peşə Təhsili üzrə Dövlət Agentliyinin birgə təşkilatçılığı ilə “Yaşıl dünya naminə həmrəylik ili” çərçivəsində mayın 24-də Cəlilabad Dövlət Peşə Təhsil Mərkəzinə “Kənd təsərrüfatında yaşıl innovasiyalar” mövzusunda infotur təşkil edilib.

Peşə Təhsili üzrə Dövlət Agentliyindən "Tehsil.biz"ə bildirilib ki, tədbirdə Agentliyin nümayəndələri, Lənkəran və Cəlilabadda yerləşən peşə təhsil müəssisələrinin rəhbərləri və işçiləri, həmçinin kənd təsərrüfatı sahəsində fəaliyyət göstərən şirkətlərin rəhbərləri və sahə ekspertləri iştirak ediblər. Qonaqlara əvvəlcə Mərkəzdə yaradılmış şərait haqqında məlumat verilib. Bildirilib ki, müasir infrastruktur, maddi-texniki baza ilə təchiz olunan Mərkəzin ərazisində 25 sinif otağı, 3 laboratoriya, 13 emalatxana, informatika kabineti, STEAM Mərkəzi, praktiki məşğələ otağı, kitabxana, 252 yerlik akt zalı, 128 yerlik yeməkxana, idman zalları və meydançaları, avtotəmir binası, maldarlıq ferması və digər köməkçi binalar yerləşir. Eyni zamanda, kənd təsərrüfatı mütəxəssislərinə artan tələbatı nəzərə alaraq bu sahə üzrə tədrisə xüsusi diqqət yetirilib. Müəssisədə kənd təsərrüfatı məhsullarının istehsalı üzrə fermer, bitkiçilik, heyvandarlıq və baytarlıq üzrə mütəxəssislər də hazırlanır. İnfoturda, həmçinin “Kənd təsərrüfatında innovativ metodların tətbiqi”, “Qənaətli suvarma sistemləri” mövzusunda təqdimatlar edilib.

Qeyd edək ki, iqtisadiyyatın dayanıqlı inkişaf modelinə keçidi və təhsilin roluna həsr olunmuş maarifləndirmə həftəsinin yekunu olaraq mayın 27-də milli sosial-iqtisadi prioritet olan təmiz ətraf mühit və “yaşıl artım” üzrə təhsil-təlim komponentlərini müzakirə etmək, bu istiqamətdə yeni sistemli yanaşmaları formalaşdırmaq məqsədilə “Yaşıl artım gündəliyində təhsil” mövzusunda konfrans keçiriləcək.

Xəbər lenti