Logo

Müəllimlər IBM üzrə “SkillsBuild for Academia” proqramına qoşulublar

03.10.2023 22:29 129 baxış
IMG

Naxçıvan Dövlət Universiteti ilə IBM arasında imzalanan əməkdaşlıq müqaviləsinə əsasən, bu sahə üzrə seçilən müəllimlər “SkillsBuild for Academia” proqramına qoşulublar. Proqrama hazırlığın vəziyyətinə dair ali təhsil ocağında görüş keçirilib.

Tehsil.biz xəbər verir ki, universitetin rektoru Elbrus İsayev müəllimlər üçün belə təlimlərin əhəmiyyətini diqqətə çatdırıb. Qeyd edib ki, bu istiqamətdə həyata keçirilən təlim və tədris proqramları  texnologiya sahəsində təhsil proqramlarını dəstəkləyərək və təmin edərək tələbələrin və tədqiqatçıların hazırlığına təkan verir. E.İsayev vurğulayıb ki, tədqiqat sahəsində universitetlərlə beynəlxalq əməkdaşlıq sahələri texnologiyaların inkişafına kömək edir. Rektor IBM üzrə seçilən müəllimlərin gələcəkdə ali təhsil ocağında qurulan Texnoparkın fəaliyyətinə mühüm töhfələr verəcəyinə inamını ifadə edib.

Görüşdə qeyd edilib ki, bu kurs çərçivəsində ilkin olaraq 20 professor-müəllim heyətinin iştirakı nəzərə alınaraq 5 modul üzrə Cloud Business (Bulud biznesi), Enterprise Design Thinking (Dizayn düşüncəsi), Artificial Intelligence (Süni intellekt), Cybersecurity (Kiber təhlükəsizlik), Data Science (Data elmi ) təlimlər həyata keçiriləcək. Eyni zamanda bu proqrama tədris materialları və TTT (train the trainer) kursları da daxildir.

Diqqətə çatdırılıb ki, artıq oktyabrda baş tutacaq “Cloud Business” təlimi üçün  3 müəllim “IBM  Skills Network”  platformasından qeydiyyatdan keçərək təlimlərə cəlb olunub.

Qeyd edək ki, IBM dünya çapında informasiya texnologiyaları və xidmətlər sahəsində liderdir. Bu əməkdaşlıqların məqsədi, texnologiya sahəsində peşəkar kadrlar yetişdirmək və müstəqil tədqiqat və inkişafı dəstəkləməkdir.

Xəbər lenti