Logo

Şəhidlərə həsr olunmuş daha iki kitabın təqdimatı keçirilib

03.10.2023 10:33 134 baxış
IMG

Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran regional filialının təşkilatçılığı ilə Azərbaycan Jurnalistlər və Yazıçılar birliklərinin üzvü, şair, yazıçı Coşqun Xəliloğlunun “Vətən yaşasın deyə” və Azərbaycan Yazıçılar Birliyinin üzvü, şairə Sevinc Arzulunun “Qarabağ - qan yaddaşım” adlı kitablarının təqdimat mərasimi keçirilib.

Bu barədə "Tehsil.biz"ə muzeydən məlumat verilib.

Tədbir Dövlət Himninin səsləndirilməsi ilə başlayıb. Daha sonra ölkəmizin ərazi bütövlüyü uğrunda şəhidlik zirvəsinə ucalan Vətən fədailərinin əziz xatirəsi bir dəqiqəlik sükutla yad edilib.

Təqdimat mərasimində muzeyin Aran regional filialının müdiri filologiya üzrə fəlsəfə doktoru Yaqut Bahadurqızı Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə 44 gün ərzində əldə olunan möhtəşəm Qələbənin müstəqillik tariximizin ən böyük Zəfəri olduğunu, Azərbaycan Ordusunun qısa zamanda Qarabağ uğrunda başladığımız haqq savaşını Qələbə ilə başa vurduğunu vurğulayıb. O, eyni zamanda, Vətən müharibəsi dövründə və ondan sonrakı quruculuq dönəmində qələmi ilə müsəlləh əsgərə dönən ziyalılarımızın, şair və yazarlarımızın rolunu dəyərləndirərək hər iki şairin yeni çapdan çıxmış “Vətən yaşasın deyə” və “Qarabağ – qan yaddaşım” kitablarından bəhs edib.

Yaqut Bahadurqızı torpaqlarımızın azadlığı uğrunda canını fəda edən şəhidlərimizin adlarının əbədiləşdirilməsi, onların həyat tarixçəsinin xalqın qan yaddaşına köçürülməsi məramı ilə istedadlı qələm sahiblərinin oxuculara təqdim etdiyi kitabların gənc nəslin hərbi vətənpərvərlik ruhunda tərbiyə edilməsində faydalı olacağını bildirib.

Şəhid ailələrindən olan Müşgünaz Əliyeva, Rəfiqə Dadaşova, Gürşad Qurbanov, Azərbaycan Yazıçılar Birliyinin üzvləri Abduləziz Xanəhmədoğlu, Mənsurə Qaçayqızı çıxışlarında qeyd ediblər ki, “Vətən yaşasın deyə” və “Qarabağ - qan yaddaşım” şeirlər kitablarında Vətən yanğısını söndürməyə gedən oğullardan bəhs edən, eləcə də Vətəni, torpağı, dövlətçiliyimizi, sülhü tərənnüm edən şeirlərin oxunaqlı olmağına səbəb müəlliflərin gördüklərinə, eşitdiklərinə, oxuduqlarına şair təxəyyülünün olmasıdır. Eyni zamanda, hər iki müəllifin təqdim etdiyi bu kitablarda şəhid valideynlərinə təskinlik verilməklə yanaşı, yeniyetmələrə, gənclərə vətənpərvərlik ruhu, qəhrəmanlıq, anaya sevgi, saf məhəbbət, dosta sədaqət və s. kimi hisslər aşılanır.

Tədbirdə şəhidlərimizə həsr olunan fotoslayd nümayiş etdirilib. Kürdəmir rayonunda qaçqın və məcburi köçkünlər üçün salınmış yeni qəsəbədə yerləşən Qarabağ Regional Təhsil İdarəsi Ağdam rayon 153 nömrəli tam orta məktəbin və Kürdəmir şəhər 3 nömrəli tam orta məktəbin şagirdləri “Vətən yaşasın deyə”, “Qarabağ qan yaddaşım” kitablarından hazırladıqları kompozisiyanı təqdim ediblər.

Təqdimat mərasiminin sonunda hər iki kitabın müəllifi Coşqun Xəliloğlu və Sevinc Arzulu çıxış edərək onların əməyinə göstərilən diqqət üçün tədbirin təşkilatçısı olan Milli Ədəbiyyat Muzeyinin Aran regional filialına və iştirakçılara minnətdarlıqlarını bildiriblər.

Müəlliflər kitablarını şəhid ailələrinə hədiyyə ediblər.

Xəbər lenti