Ostin şəhərində Texas Universitetinin Simfonik Orkestri (UTSO) Azərbaycan mədəniyyətini və musiqisini əks etdirən konsert proqramı təqdim edib.

Bu barədə "Tehsil.biz"ə Diasporla İş üzrə Dövlət Komitəsindən məlumat verilib.

Bildirilib ki, Batler Musiqi Məktəbinin 700 nəfərlik Beyts zalında baş tutan konsertdə Azərbaycan icmasının və yerli ictimaiyyətin nümayəndələri iştirak ediblər.

UTSO-nun və ümumiyyətlə, Amerika Birləşmiş Ştatlarının tarixində ilk dəfə olaraq simfonik orkestrlə birgə kamança və nağara, muğam və rəqs sənətinin iştirakı ilə keçirilən musiqi gecəsində Azərbaycanın görkəmli bəstəkarı Hacı Xanməmmədovun kamança və simfonik orkestr üçün konserti və Fərhad Xudiyevin "Əbədiyyətin səsləri" simfonik əsəri təqdim olunub.

Tanınmış dirijor və bəstəkar, Azərbaycan əsilli amerikalı musiqiçi Fərhad Xudiyevin idarə etdiyi konsertdə Azərbaycanın xalq artistləri Alim Qasımov (xanəndə) və Natiq Şirinov (nağara ifaçısı), ABŞ-da yaşayan kamança ustası İmamyar Həsənov və rəqqasə Ləman Hendriks çıxış ediblər.

Azərbaycanlı sənətçilərin virtuoz ifalarına valeh olan tamaşaçılar onların çıxışlarını gur alqışlarla qarşılayıblar.

Maestro Xudiyev tədbirin uğurla keçirilməsi üçün göstərdikləri dəstəyə və töhfələrinə görə xeyriyyəçi və donor Ernest və Sarah Batlerə, Batler Musiqi Məktəbinin rəhbərliyinə, Azərbaycan-Amerika Musiqi Fondunun təsisçisi və icraçı direktoru Cəmilə Cavadova-Şpitsberqə təşəkkürünü bildirib.

Azərbaycan icmasının üzvləri isə öz növbəsində orkestrə, Batler Musiqi Məktəbinin rəhbərliyinə və tanınmış həmyerlimizə minnətdarlıqları ifadə ediblər.

Qeyd edək ki, Fərhad Xudiyev Azərbaycan mədəniyyətinin və klassik musiqisinin Amerika səhnəsində geniş təbliğ olunmasının ən böyük dəstəkçilərindən biridir.