Azərbaycan Memarlıq və İnşaat Universitetinin (AzMİU) müəllimləri və tələbələri nüfuzlu Romualdo Del Bianco Fondunun təşkilatçılığı ilə onlayn formatda keçirilən “Dünya Florensiyada” adlı forumda iştirak ediblər.

AzMİU-dan "Tehsil.biz"ə bildirilib ki, fondun üzvü olan müxtəlif ölkələrin universitetlərinin də iştirak etdiyi forumun keçirilməsində məqsəd “Life Beyond Tourism” hərəkatının fəaliyyəti haqqında məlumat vermək və “Dünya Florensiyada” adlı sərgini təşkil etmək olub.

Forumun açılışında AzMİU-nun rektoru professor Gülçöhrə Məmmədovanın salamlama videoçarxı nümayiş olunub. Rektor iştirakçılara və fondun işinə uğurlar arzulayıb, əməkdaşlığın daha da gücləndirilməsi perspektivlərindən danışıb.

Daha sonra AzMİU-nun Memarlıq konstruksiyaları və abidələrin bərpası kafedrasının müdiri professor Səbinə Haciyeva və İctimaiyyətlə əlaqələr və marketinq mərkəzinin direktoru İsa Muradov çıxış edərək əməkdaşlıq çərçivəsində görülən işlərdən, nəzərdə tutulan ortaq layihələrdən danışıblar.

Forumda AzMİU-nun Memarlıq fakültəsinin tələbələrindən ibarət işçi qrupunun “Gəncə ruhunun mədəni ifadələri” adlı təqdimatı da nümayiş olunub.