Logo

Elm və Təhsil Nazirliyində korrupsiya var? - İDDİA+FOTO

11.08.2022 11:06 804 baxış
IMG

"Bu suala məktəblərin təchizatı timsalında cavab verək. Mənə məktəblərə verilən və məktəbin idman zalında tamaşaçıların əyləşməsi üçün nəzərdə tutulan iki növ oturacağın fotusunu göndəriblər. Səthi və ayaqları adi oduncaqdan düzəldilib boyadılan 5 nəfər şagirdin oturması üçün nəzərdə tutulan belliyi olmayan taxta oturacağın qaimədə göstərilən qiyməti 270 manatdır".

Tehsil.biz xəbər verir ki, bunları təhsil eksperti Kamran Əsədov iddia edib. O, bu barədə sosial hesabında məlumat paylaşıb.

Ekspert bildirib ki, nazik dəmir profildən ayaqları, səthi taxta reykadan olub 3 nəfərin oturması üçün nəzərdə tutulan belliyi olmayan oturacaq da eyni qiymətə məktəblərə verilib: "Ölkənin bir-çox məktəblərində şagirdlər üçün stol-stul və lövhə kimi adi sinif ləvazimatlarının çatışmadığı, dərsliklərin belə çatışmadığı bir şəraitdə bu avadanlıqları məktəblərə verməyin adı nədir? Bu kustar üsulla sexlərdə hazırlanan oturacaqların qaimədə göstərilən qiymətinə azı 5 beləsini düzəltdirmək olar".

Kamran Əsədovun iddialarına görə, ölkədəki 44 günlük müharibənin qələbəsini əks etdirən və məktəblərə verilən 3-4 kvadrat metrlik və çərçivəyə alınmış banerin də qaimə qiyməti 350 manatdır: "Bu banerlərin oxşarı aprel döyüşlərində və müharibə zamanı ölkə üzrə bütün məktəblərə verilib və guya bizim nazirlik də müharibəyə öz töhfəsini verib. Bunlar hansı vicdanla insanlarımızın qanı tökülən ərəfədə milyonlarla dövlət vəsaitini israf ediblər? Bu banerin maya dəyəri faktura və qaimədə göstərilən qiymətdən ən azı 5 dəfə ucuzdur. Görürsünüzmü, hətta kimlərinsə ölümü ilə belə digərləri dirilmək yolunu necə tapır?"

Təhsil ekspertinin digər iddiasına görə isə, növbəti fakt isə Prezidentin xaricdə təhsil almağa göndərdiyi və etimad etdiyi bu kadrların onun portretinin birinin 495 manatdan sənədləşdirib məktəblərə göndərilməsidir:

"Hesab edirlər ki, belə halda heç kim onların korrupsiya əməllərini araşdırmağa cürət etməz. Ölkənin təhsil siyasətini aparmalı olan və onları görəvləndirən prezidentin portretindən belə külli miqdarda qazanc əldə etmək yolunu tutan bu məmurlara daha sözüm yoxdur. Nazirliyin məktəblərə verdiyi mal-material və təchizatlar adətən kustar üsulla və sexlərdə hazırlanır. Burada məqsəd həmin aktivlərin qiymətini və maya dəyərini hesablamağın maraqlı tərəflərə əlçatmaz edilməsi və onlarn rahatlıqla maya dəyərindən dəfələrlə baha göstərilə bilməsidir. Bunlardansa heç olmazsa, faktiki qiyməti maya dəyərindən 3 dəfə baha göstərilən 250 manatlıq parta və lövhələrdən məktəblərə verəydilər, adama təsir etməzdi".

Qeyd edək ki, Kamran Əsədovun bu yazıdakı iddiaları ilə bağlı Elm və Təhsil Nazirliyinə sorğu göndərilib.

Xəbər lenti