"Normal bir cəmiyyət formalaşdırmağın ana yolu təhsildən keçir! O səbəbdən, bu yoldakı yanlışlıqlar cəmiyyəti bütövlükdə uçruma apara biləcək qədər təhlükəlidir".
Tehsil.biz xəbər verir ki, bu fikirləri keçmiş maliyyə naziri, iqtisadçı alim Fikrət Yusifov bildirib.
O, özünün müəllim ailəsində böyüdüyünü, əmək fəaliyyətinin tən yarısını Azərbaycan və Rusiya ali məktəblərində müəllimliklə bağlı olduğunu qeyd edib:
"Bu səbəbdən təhsildə olan saysız-hesabsız problemlərdən yetərincə məlumatlıyam. Bu statusumda o problemlər barəsində sizlərin fikirlərini almaq olduqca önəmlidir. Orta təhsil məktəblərdən çıxarılaraq, müəllimlərin evlərinə göndərildiyi vaxtdan bu günə qədər təhsil sistemi irəliyə deyil, geriyə gedir. Təhsilimizdə uğurlu islahatlardan danışanlara bircə sual yetərlidir: "Bir anlıq təsəvvür edirsinizmi, repetitor yanına getməyən bir şagird, orta məktəbdə aldığı təhsillə, yüksək bal toplayaraq, ali məktəbə daxil olur?" İndi bu mümkün deyil və bu mümkünsüzlük təhsil sistemində qara yara kimi kök salmış bir çox neqativlərin nəticəsində baş verir".
Fikrət Yusifov bildirib ki, bu gün açıq bazar prinsipi ilə işləyən məktəb direktorlarının demək olar ki, hamısı oliqarxa çevriliblər:
"Təbii ki, onları nazir və bu ranqda olan iri məmur oliqarxlarla müqayisə etmirik, bəlkə də onlara müqayisədə məktəb direktorlarına mini oliqarxlar deməliyik. Hansı məktəb direktorunu bir qədər araşdırsan, onun ən azından bir neçə bahalı avtomobili, bir neçə villası, biznes obyektləri və s. ortaya çıxacaqdır. Dediklərimin həqiqət olub-olmadığını məktəblərdə 300-400 manat ətrafında əməkhaqqı alan müəllimlərdən soruşun, onlar direktorun məktəbdəki gəlir mənbələrini və onun varidatının siyahısını bir dəqiqə ərzində sizə ərz edəcəklər. Ancaq bunu gizlincə edin, əks halda oliqarx direktor sorğu etdiyiniz müəllimi həmən işdən çıxarar. Məktəb direktorunun (təhsil müəssisəsinin başçısının) oğru və rüşvətxor olduğunu görən orta məktəb şagirdi, gələcəkdə mütləq onun yolunu seçəcək. Çünki o, belə həyat tərzinin normal olduğu bir cəmiyyətdə yaşayır!"
