Fövqəladə Hallar Nazirliyinin (FHN) Akademiyasında Novruz bayramı münasibəti ilə tədbir keçirilib.

FHN-dən Tehsil.biz-ə verilən xəbərə görə, tədbirdə Akademiyanın rəhbərliyi, professor-müəllim heyəti və kursantlar iştirak edib. Tədbiri giriş sözü ilə açan Akademiyanın rəisi, general-mayor Baba Salayev ali təhsil müəssisəsinin əməkdaşlarını və kursantları Novruz bayramı münasibətilə təbrik edib. Novruz bayramına dair ənənələr və rəmzlər barədə məlumat verən Akademiya rəisi bildirib ki, xalqımız min illər ərzində təşəkkül tapmış ənənələrə sadiq qalaraq bu milli bayramı təntənə ilə qeyd edir. Novruz bayramının kütləvi el şənlikləri və mərasimlərlə dövlət səviyyəsində keçirilməsi və yurdumuzun hər bir guşəsində sonsuz sevinclə qarşılanması milli müstəqilliyimizin bizə bəxş etdiyi nailiyyətlərindəndir və tarixi-milli irsimizə bağlılığımızın parlaq təzahürlərindəndir.

Cənab Prezident, Silahlı Qüvvələrin Müzəffər Ali Baş Komandanı möhtərəm İlham Əliyevin rəhbərliyi ilə 44 günlük Vətən müharibəsində qazanılmış tarixi Zəfərdən söz açan rəis B.Salayev diqqətə çatdırıb ki, baharın gəlişi məhz bu şanlı qələbə sayəsində işğaldan azad edilmiş ərazilərimizdə də böyük təntənə ilə qeyd olunur.

Sonra tədbirin bədii hissəsi Akademiyanın hərbi orkestrinin konsert proqramı ilə təqdim edilib.