Bakı Dövlət Universitetində 27 Mart - Azərbaycan Respublikasında “Elm Günü”nə həsr olunmuş silsilə tədbirlər davam edir.

Tehsil.biz xəbər verir ki, martın 15-də Kimya fakültəsində Yüksək molekullu birləşmələr kimyası kafedrasının müdiri, professor Rasim Alosmanov “Yeni kimyəvi materialların perspektivli məhsul kimi tətbiqi” mövzusunda ustad dərsi keçib.

Rasim Alosmanov tələbələrə yeni materialların müasir dünyadakı rolu və onun növləri haqqında ümumi məlumat verib. Sonra yeni material kimi polimer fırçalar və nanosellüloza haqqında danışıb. O, nanosellülozanın bir növü olan bakterial sellüloza əsasında polimer fırçaların sintezi və bu materialların tibb sahəsində, xüsusi ilə də hemostatik kompozisiya kimi tətbiqinə dair ətraflı bəhs edib.

Ustad dərsi tələbələrin mövzu ilə bağlı suallarının cavablandırılması ilə davam edib.