Logo

Təhsil Nazirliyi yanında İctimai Şuranın üzvləri BSU-da imtahan sessiyasının monitorinqini keçiriblər

26.01.2022 13:11 257 baxış
IMG

Yanvarın 26-da Azərbaycan Respublikası Təhsil Nazirliyi yanında İctimai Şuranın üzvləri - Milli Məclisin deputatı Etibar Əliyev, Məleykə Əlizadə və Pərvanə Məmmədova  2021-2022-ci tədris ilinin payız semestrinin imtahan sessiyasının monitorinqinin keçirilməsi məqsədilə Bakı Slavyan Universitetində olublar.

Tehsil.biz xəbər verir ki, onlar BSU-nun Xarici dillər fakültəsində keçirilən semestr imtahanlarını və Təhsil fakültəsində Yekun Buraxılış Dövlət  Attestasiyasını izləyib, imtahan sualları ilə tanış olub, tələbələrə uğurlar arzulayıblar.

Həmçinin imtahan yoxlama və kodlaşdırma otaqlarının, Apellyasiya komissiyalarının, Əsaslı kitabxananın, Tərcümə və leksikoqrafiya elmi-tədqiqat laboratoriyasının fəaliyyəti ilə tanış olublar.

BSU-nun rektoru səlahiyyətlərini icra edən siyasi elmlər üzrə fəlsəfə doktoru Anar Nağıyevlə payız semestrinin imtahan sessiyasının təşkili və keçirilməsi qaydaları, statistik göstəricilər barədə geniş məlumat verilib. Vurğulanıb  ki, BSU-da imtahan sessiyası  tədrisin ənənəvi təşkilinə dair mövcud  qaydalar  və Təhsil Nazirliyinin müvafiq əmri əsasında  keçirilir. Sessiyanın təşkilinə və gedişinə nəzarət  etmək məqsədilə universitet rəhbərliyi, valideyn şuraları, tələbə təşkilatları, müvafiq struktur bölmələrin nümayəndələrindən ibarət İmtahan Qərargahı, fakültələrdə Apellyasiya komissiyaları fəaliyyət göstərir. İctimai Şuranın üzvləri imtahan sessiyasının şəffaf və obyektiv keçirilməsindən məmnun qaldıqlarını bildiriblər.
. Qeyd edək ki, “İctimai iştirakçılıq haqqında” Azərbaycan Respublikasının Qanununa uyğun olaraq yaradılmış İctimai Şuranın əsas məqsədi Təhsil Nazirliyinin fəaliyyətində şəffaflığı artırmaq, eyni zamanda təhsil sahəsində ictimaiyyətlə qarşılıqlı əlaqələri gücləndirməkdir.

BSU-da keçirilən monitorinq də bu istiqamətdə atılan addımlardan biridir.

Xəbər lenti