"Ağdam şəhərində Qarabağ Universitetinin yaradılması tarixi hadisədir. Bu, Qarabağda yaradılacaq ilk universitet olacaq".
Tehsil.biz-in məlumatına görə, bunu millət vəkili Fatma Yıldırım deyib.
Millət vəkili bildirib ki, Ağdam şəhərində Qarabağ Universitetinin yaradılması böyük əhəmiyyət kəsb edir:
"Bu universitet ilk növbədə Qarabağ bölgəsinin inkişafı üçün kadr potensialı yetişdirməklə regiona öz tövhəsini verəcək. Bu səbəbdən də ixtisaslar bölgənin spesifikasına uyğun formada müəyyənləşdirilməlidir. Ən başlıcası isə universitetə xarici ölkələrdən də təhsil almaq üçün tələbələr cəlb olunmalıdır. Bunun üçün isə universitetin maddi-texniki bazası ən son texnologiyalar əsasında qurulmalı, peşəkar professor-müəllim heyəti formalaşdırılmalıdır. Türkiyə və Avropa ölkələrində təhsil alan yüksəkixtisaslı kadrlara-vətəndaşlarımıza üstünlük verilməlidir”.
F.Yıldırım qeyd edib ki, eyni zamanda Qarabağ Universitetinin beynəlxalq əlaqələri yüksək səviyyədə qurulmalıdır:
“Bu amil Qarabağ Universitetinin dünyada tanınması üçün vacib məqamlardan ola bilər".
BakuPost