Logo

“Naxçıvan Muxtar Respublikasında camışçılığın iqtisadi əhəmiyyəti və inkişaf perspektivləri”

18.10.2021 17:19 66 baxış
IMG

Naxçıvan Dövlət Universitetinin professoru Etibar Məmmədovun “Naxçıvan Muxtar Respublikasında camışçılığın iqtisadi əhəmiyyəti və inkişaf perspektivləri” adlı dərs vəsaitinin təqdimatı keçirilib.

Bu münasibətlə keçirilən tədbirdə universitetin Tədris və tərbiyə işləri üzrə prorektoru Rafiq Rəhimov qeyd edib ki, muxtar respublikada əhalinin keyfiyyətli və təhlükəsiz heyvandarlıq məhsulları ilə taminatının qorunub saxlanılması məqsədilə Naxçıvan Muxtar Respublikası Ali Məclisi Sədrinin 2020-ci il 17 fevral tarixli Sərəncamı ilə “2020-2025-ci illərdə Naxçıvan Muxtar Respublikasında baytarlıq təbabətinin inkişafı üzrə Dövlət Proqramı” təsdiq edilib və bu sahədə ardıcıl işlər həyata keçrilir. Bildirilib ki, təqdimatı keçirilən dərs vəsaiti də təsdiq edilən dövlət proqramlarına uyğun tərtib edilib.

“Baytarlıq təbabəti” kafedrasının dosenti, biologiya üzrə fəlsəfə doktoru, Əli Tahirov məruzəsində bildirib ki, hazırda muxtar respublikada baytarlıq təbabətinin inkişafı istiqamətində kompleks tədbirlər həyata keçirilir. Müasir şəraitlə təmin olunan binada fəaliyyət göstərən “Baytarlıq kafedrası” baytar-həkimlərin hazırlanmasında öz səylərini göstərir. Diqqətə çatdırılıb ki, dərs vəsaitində çox nadir genefonda malik olan, qiymətli kənd təsərrüfatı heyvanı kimi dünyanın bir çox ölkələrində yayılan camışların biomorfoloji xüsusiyyətləri, anatomik quruluşu, məhsuldarlıq göstəriciləri haqqında ətraflı məlumatlar verilib. 

AMEA Naxçıvan Bölməsinin Bioresurslar İnstitunun direktoru, biologiya üzrə elmlər doktoru İsmayıl Məmmədov dərs vəsaitində qeyd olunan camışçılığın inkişaf perspektivləri, iqtisadi əhəmiyyəti, Naxçıvan Muxtar Respublikasının təbii-iqlim və təsərrüfat xüsusiyyətləri, camışların sistematikası və yer kürəsində yayılması mövzuları haqqında məlumat verib. 

Naxçıvan Dövlət Texniki Kollecinin direktoru, aqrar elmlər üzrə fəlsəfə doktoru Asəf Ruşanov  kollecdə baytarlıq ixtisası üzrə təhsil alan tələbələr üçün dərs vəsaitinin əhəmiyyətindən danışıb. Qeyd olunub ki, bu sahəyə göstərilən qayğının nəticəsində baytarlıq ixtisası üzrə dərs vəsaitlərin nəşri gələcəkdə baytar-həkimlərin yetişməsinə verilən dəyərli töhfədir. 

“Baytarlıq təbabəti” kafedrasının müdiri, biologiya üzrə fəlsəfə doktoru, dosent Yunis Rüstəmli vurğulayıb ki, müəllifin gərgin əməyi nəticəsində ərsəyə gələn kitab baytar həkimləri, zooloqlar, ekoloqlar eləcə də ali və orta ixtisas təhsili müəssisələrinin müəllim və tələbələrinin istifadəsi üçün nəzərdə tutulub. 

Sonda müəllif Magistrutara mərkəzinin direktoru, “Baytarlıq təbabəti” kafedrasının professoru, biologiya üzrə elmlər doktoru Etibar Məmmədov bu cür dərs vəsaitlərinin hazırlanmasının gələcəkdə də davam etdirəcəyini bildirərək göstərilən diqqət və qayğıya görə minnətdarlığını ifadə edib.

Xəbər lenti