Çin ilə Azərbaycan arasında əməkdaşlıq təkcə qarşılıqlı faydalı deyil, həm də açıq-aydın humanitar xarakter daşıyır və hər iki ölkənin xalqlarına birbaşa fayda gətirir.

Bu barədə Çin Xalq Respublikasının Azərbaycandakı səfiri Lu Mey ötən il ərzində ikitərəfli münasibətlərin inkişafının yekunlarına həsr olunmuş brifinq zamanı bildirib.

Diplomatın sözlərinə görə, iki dövlət başçısının imzaladığı humanitar minatəmizləmə sahəsində əməkdaşlığın möhkəmləndirilməsinə dair Anlaşma Memorandumunun icrası çərçivəsində Çin tərəfi Azərbaycan Respublikasının Minatəmizləmə Agentliyinə 2 milyon yuan məbləğində maliyyə yardımı göstərib. Bu vəsaitlər işğaldan azad edilmiş ərazilərin minalardan təmizlənməsi və bərpası potensialının artırılmasına, həmçinin yerli əhalinin həyatının təhlükəsizliyinin təmin edilməsinə yönəldilib.

Lu Mey qeyd edib ki, Çin də Azərbaycanda bir sıra sosial və təhsil təşəbbüsləri həyata keçirir. Xüsusilə Bakının Xəzər rayonundakı iki uşaq evinə Çin istehsalı olan elektron avadanlıqlar təhvil verilib. Onların bazasında sağlamlıq imkanları məhdud olan Azərbaycan gənclərinin rəqəmsal dövrə daha uğurla uyğunlaşmasına kömək etmək üçün Çin-Azərbaycan dostluğu rəqəmsal auditoriyaları yaradılıb.

Səfir bildirib ki, bu ilin noyabr ayında o, Çin tərəfindən maliyyələşdirilən distant təhsil avadanlıqlarının Naxçıvan Muxtar Respublikasında təhvil verilməsi mərasimində iştirak edib. Layihə çərçivəsində Naxçıvanın 216 məktəbi onlayn təlim üçün müasir avadanlıqla təmin olunub ki, bu da məktəblilər üçün tədris şəraitinin əhəmiyyətli dərəcədə yaxşılaşdırılmasına imkan yaradıb.

Vurğulanıb ki, humanitar əməkdaşlıq ikitərəfli xarakter daşıyır. Azərbaycan tərəfi öz növbəsində Yunnan əyalətinin Malipo qəzasının ikinci ibtidai məktəbi üçün oyun meydançasının tikintisinə vəsait ayırmaqla Çində təhsil sahəsinə dəstək verib.

“İnsanların yaşayış şəraitinin yaxşılaşdırılmasına yönəlmiş bu layihələr ölkələrimiz arasında dostluğun təsirli nümunələridir. Əməkdaşlığın bəhrələri həqiqətən də adi vətəndaşlara, xüsusən də gənc nəslə fayda gətirir, Çin-Azərbaycan dostluğuna ictimai dəstəyin daha da möhkəmləndirilməsi üçün möhkəm zəmin yaradır”, - deyə Lu Mey qeyd edib.