Kiçik və Orta Biznesin İnkişafı Agentliyi (KOBİA) Lənkəranda “Sahibkarların dövlətin dəstək mexanizmləri barədə məlumatlandırılması” mövzusunda maarifləndirici görüş keçirib. Tədbirdə sahibkarlar onları maraqlandıran bir sıra aktual məsələləri müzakirə edərək, dövlətin dəstək mexanizmləri haqqında ətraflı məlumat əldə ediblər. Görüşdə Əqli Mülkiyyət Agentliyinin mütəxəssisləri də iştirak ediblər.

Bu barədə TƏHSİL.BİZ -ə Agentlikdən məlumat verilib. Tədbirdə Əqli Mülkiyyət Agentliyinin Hüquq, apellyasiya və sənaye mülkiyyəti obyektlərinin qeydiyyatı şöbəsinin müdir müavini – sektor müdiri Nailə Nəsibova və Agentliyin tabeliyində olan Patent və əmtəə nişanlarının ekspertizası mərkəzinin iddiaçıların əqli mülkiyyətə dair sorğuları üzrə iş sektorunun müdiri Lamiyə Haqverdiyeva Agentliyin fəaliyyət istiqamətləri, sahibkarlara göstərilən dəstək mexanizmləri və “Patentlərə, Əmtəə Nişanlarına Açıq Hədəf” (PƏNAH) rəqəmli informasiya sistemi, “Çağrı Mərkəzi” və Sənaye Mülkiyyəti Obyektlərinin Reyestri – ixtiralar, faydalı modellər, sənaye nümunələri, əmtəə nişanları və coğrafi göstəricilərə dair “Açıq reyestr”lər barədə ətraflı məlumat veriblər.

Həmçinin tədbir iştirakçılarının əmtəə nişanlarının qeydiyyatı prosedurları, bu sahədə hüquqların qorunması və müdafiəsi ilə bağlı sualları Agentliyin mütəxəssisləri tərəfindən cavablandırılıb.

Tədbirdə Lənkəran Şəhər İcra Hakimiyyəti, Azərbaycan Qida Təhlükəsizlik Agentliyi, Azərbaycan Dövlət Reklam Agentliyi, Dövlət Vergi Xidməti, Antiinhisar və İstehlak Bazarına Nəzarət Dövlət Agentliyinin və digər aidiyyəti qurumların nümayəndələri iştirak ediblər.